تضمین سرور کہوں کہ مالک مولی کہوں تجھے

ظلمت میں ایک نُور چمکتا کہوں تجھے
یا زخم زخم دل کا مداوا کہوں تجھے
حیراں ہوں اے حبیبِ خُدا کیا کہوں تجھے
’’ سرور کہوں کہ مالک و مولا کہوں تجھے
باغِ خلیل کا گلِ زیبا کہوں تجھے‘‘

اے شاہِ دوسرا! میں ترا خانہ زاد ہوں
پھر کس لئے میں گردشِ ایّام سے ڈروں
پیشِ نگاہ آیہِ لاتقنطو رکھوں
’’حرماں نصیب ہوں، تجھے امید گہ کہوں
جانِ مُراد و کانِ تمنّا کہوں تجھے‘‘

اوصاف تیری ذات کے اور میری کاوشیں
ادنٰی ہے فکر اور ہیں اعلٰی یہ خواہشیں
انوار کی ہیں آٹھ پہر تجھ پہ بارشیں
’’اللہ رے تیرے جسمِ منور کی تابشیں
اے جانِ جاں! میں جانِ تجلا کہوں تجھے‘‘

ہر چند بحرِ رنج و غم و یاس میں بہوں
برداشت دردِ دل کروں، سوزِ جگر سہوں
مصروف یونہی میں تری توصیف میں رہوں
’’بے داغ لالہ یا قمرِ بے کلف کہوں
بے خار گلبنِ چمن آرا کہوں تجھے‘‘

اس طرح مشکلات کو آساں کروں شہا
امید کے چراغ فروزاں کروں شہا
یونہی علاجِ ظلمتِ عصیاں کروں شہا
’’مجرم ہوں اپنے عفو کا ساماں کروں شہا
یونی شفیع روزِ جزا کا کہوں تجھے‘‘

کس کی مجال ہے جو کرے تیری ہمسری
حاصل ہے تجھ کو کشورِ عصمت کی قیصری
خلّاقِ کائنات نے بخشی ہے بہتری
’’تیرے تو وصف عیبِ تناہی سے ہیں بری
حیراں ہوں میرے شاہ میں کیا کیا کہوں تجھے‘‘

تُو راز ہے خدائے علیم و خبیر کا
تیری ثنا میں کوئی ثنا گر کہے تو کیا
حافؔظ تو سوچتا ہی سرِ بزم رہ گیا
’’لیکن رضؔا نے ختمِ سخن اس پہ کردیا
خالق کا بندہ خلق کا آقا کہوں تجھے‘‘

تضمین نگار: حافظ عبد الغفّار حافؔظ​