.کوئی گل باقی رہے گا نہ چمن رہہ جائے گا تضمین بر کلامِ سیِّد کفایت علی کافیٓ علیہ الرحمہ

تضمین :

بر کلامِ سیِّد کفایت علی کافیٓ علیہ الرحمہ

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سوزِ خلوت اور نہ سازِ انجمن رہ جاۓ گا

کوئی نغمہ اور نہ کوئی خوش دَہن رہ جاۓ گا

وَحشی و مجنوں نَہ کوئی دَشت وبَن رہ جاۓگا

کوئی گُل باقی رہے گا نَے چمن رہ جاۓ گا

پر رسول اللّٰہ کا دینِ حَسَن رہ جاۓ گا

بے ثبات اُٹھ جاۓ گا مِٹ جاۓ گا نقشِ قرار

عرصۂ عالَم رہے گا وقت کا پرکار زار

یوں تو ہو گا ہر حجابِ کہنہ رُخ بھی تَار تَار

اِنقلابِ دَور گو دنیا میں ہو گا لاکھ بار

سکّۂ دینِ نبی کا پر چلن رہ جاۓ گا

بھول جاۓ گی مہک کر جھومنا بادِ صبا

آشیاں جل جاۓ گا مَوسم نہ ہو گا جانفزا

سازِ لَے بدلے گا ہر رقّاصِ خوش آہنگ کا

ہَم صفیرو ! باغ میں ہے کوئی دَم کا چہچہا

بلبلیں اُڑ جائیں گی سُونا چمن رہ جاۓ گا

آنکھ وہ کیاآنکھ جس میں اَشک کا طوفاں نہ ہو

دِل وہ کیا دِل جس میں شوقِ جلوۂ جاناں نہ ہو

حیف ایسی زندگی پر ، عقبیٰ کا ساماں نہ ہو

اطلس و کمخواب کی پَوشاک پر نازاں نہ ہو

اِس تنِ بے جان پر خاکی کفَن رہ جاۓ گا

نقشِ تصویرِ بُتاں مِٹ جائیں گے لیکن یہاں

عہد و پیمانِ زباں مِٹ جائیں گے لیکن یہاں

اہلِ عیشِ جاوِداں مِٹ جائیں گے لیکن یہاں

نامِ شاہانِ زباں مِٹ جائیں گے لیکن یہاں

حشر تک نام و نشانِ پنجتن رہ جاۓ گا

وجہِ اَرض و گردشِ افلاک کے اوپر درود

قبلۂ قدسی و اہلِ خاک کے اوپر درود

شافعِ محشر رسولِ پاک کے اوپر درود

جو پڑھے گا صاحبِ لَولَاک کے اوپر درود

آگ سے محفوظ اُس کا تَن بدَن رہ جاۓ گا

ہوں گے نطقِ دیگراں ماضی و لیکن حشر تک

محفلیں ہو جائیں گی خالی و لیکن حشر تک

خاک ہو گا گفتۂ رازیٓ و لیکن حشر تک

سب فنا ہو جائیں گے کافیٓ و لیکن حشر تک

نعتِ حضرت کا زبانوں پر سخن رہ جاۓ گا

از : میرزا امجد رازیٓ